وزیراعظم شہبازشریف نے ماہ رمضان میں عوام کے لیے خصوصی ریلیف پیکج کا حجم ساڑھے 7 ارب سےبڑھا کر ساڑھے 12 ارب کردیا۔
رمضان ریلیف پیکج کا حجم بڑھانےکےعلاوہ دائرہ کار بھی مزید وسیع کرنے کی ہدایت جاری، یوٹیلیٹی اسٹورز،بی آئی ایس پی کےساتھ ساتھ موبائل یونٹس بھی سستےداموں اشیافراہم کریں گے۔
وزیراعظم نے متعلقہ حکام کو ہدایت کی ہے کہ زیادہ سے زیادہ غریب، نادار اور مستحق افراد تک رمضان ریلیف پیکج پہنچایاجائے۔
یاد رہے کہ پیکج کے تحت مستحق افراد کو بازارسے30 فیصد کم قیمت پر اشیائے خورونوش ملیں گی، رمضان ریلیف پیکج کےتحت آٹے پر فی کلو77 روپے اور گھی پر70 روپے فی کلوسبسڈی دی جائے گی۔
ابتدائی طورپر 1200 موبائل پوائنٹس اور 300 مستقل پیکج ریلیف مراکز قائم کئے جارہے ہیں، متعین مقامات کے علاوہ ٹرک مختلف علاقوں میں غریب عوام کو سستی اشیائے خوردونوش پہنچائیں گے۔ یکم رمضان سے اختتام رمضان تک ریلیف پیکج کے تحت عام بازار سے کم قیمت پر اشیاءفراہم کی جائیں گی۔
بے نظیر انکم سپورٹ پروگرام کے تحت آٹا، چاول، دال، گھی، چینی، شربت اور دودھ مارکیٹ سے کم قیمت پر فراہم کیاجائے گا۔
مقام کا تعین جدید ٹیکنالوجی ’جی پی ایس‘ کی مدد کیا جائے گا، موبائل ایپ کے استعمال کی راہنمائی کے لئے خصوصی وڈیو بھی جاری کی جائے گی، ڈیجیٹل ٹیکنالوجی کی مدد سے چلنے والا ڈیش بورڈ تیار کیا جارہا ہے تاکہ موبائل آٹے کی فروخت کی نگرانی ہوسکے۔
موبائل یونٹس کے ایک سے دوسرے مقام منتقلی کے دوران آٹے کی فراہمی کا عمل جاری رہے گا، موبائل اور لائیو فوٹیج سے آٹے کی تقسیم کی مسلسل نگرانی کی جائے گی۔
