گندم درآمد سکینڈل کی تحقیقات کیلئے قائم کمیٹی کے سربراہ سیکرٹری کابینہ کامران علی افضل نے گزشتہ شب وزیر اعظم شہباز شریف سے ملاقات کی۔ وزیراعظم نے معاملے کی ہر لحاظ سے مکمل اور شفاف تحقیقات کا حکم دے دیا۔
اپنے گھر میں تیار کھڑی گندم کی بمپر فصل ہوتے ہوئے بیرون ملک سے گندم منگوانے والوں کے نام اب صیغہ راز میں نہیں رہیں گے۔ وزیراعظم نے تحقیقاتی کمیٹی کے سربراہ اور سیکرٹری کابینہ کامران علی کو سارا کچا چٹھا سامنے لانے کی ہدایت کردی۔
سیکرٹری کابینہ کامران علی افضل نے گزشتہ شب وزیراعظم سے ملاقات کی۔ شہباز شریف نے گندم درآمد اسکینڈل کی ہر لحاظ سے مکمل اور شفافت تحقیات کرنے، دستیاب ریکارڈ اور دستاویزات کو سامنے رکھ کر سفارشات مرتب کرنے کی ہدایت کردی۔۔ وزیراعظم نے پیر کو حتمی رپورٹ بھی مانگ لی۔
شہباز شریف نے دو ٹوک کہہ دیا کہ اس معاملے میں کوئی لگی لپٹی مت رکھیں۔ مجھے ذمہ داروں کا تعین کرکے بتایا جائے۔ کسانوں کے منہ سے نوالہ چھیننے میں ملوث کسی شخص کے ساتھ کوئی رعایت نہیں برتی جائے گی۔ ذرائع کے مطابق کمیٹی اتوار کے روز چھٹی کے باوجود پہلی کمیٹی کی رپورٹ کا جائزہ لے گی۔
