آرمی چیف جنرل عاصم منیر کا کہنا ہے کہ ہم اپنی آئینی حدود کو بخوبی جانتے ہیں اور دوسروں سے بھی آئین کی پاسداری کو مقدم رکھنے کی توقع رکھتے ہیں۔
رسالپور میں پاکستان ایئرفورس کی پاسنگ آؤٹ پریڈ سے خطاب میں آرمی چیف جنرل عاصم منیر نے کہا کہ آئین کے آرٹیکل 19 میں واضح طور پر آزادی اظہار رائے کی حدود متعین ہیں، آزادی رائے کی قیود کی برملا پامالی کرنے والے دوسروں پر انگلیاں نہیں اٹھاسکتے۔
پاسنگ آؤٹ پریڈ سے خطاب میں جنرل عاصم منیر نے کہا کہ آپ ہماری امیدوں کا مرکز، آسمانوں کے محافظ، علاقائی یکجہتی کے ضامن ہیں۔ توقع ہے آپ کردار، ہمت، قابلیت کی خوبیوں سےمزین زندگی گزاریں گے اور آپ کا طرز عمل قابل احترام ادارے کیلئے بھی غیرمعمولی ہوگا۔
آرمی چیف نے کہا کہ توقع ہے آپ بہادری کی لازوال روایت کو قائم رکھیں گے، آپ مادروطن کے دفاع، عزت اور وقارکیلئے قربانی سے کبھی دریغ نہیں کرینگے، توقع ہے آپ بہترین جذبہ اورپیشہ ورانہ مہارت کوبرقرار رکھیں گے۔ آپ ریاست پاکستان کے ساتھ وفادار رہیں اور آپ کو جوذمہ داری سونپی جارہی ہے اس کیلئے پرعزم رہیں۔
نواجوان آفیسرز سے خطاب میں جنرل عاصم منیر نے کہا کہ ہمیشہ یادر کھیں حق طاقت جبکہ باطل کبھی طاقتورنہیں ہوسکتا، راشد منہاس، سرفرازرفیقی، ایم ایم عالم نے وطن کے وقار، تحفظ کیلئے زندگیاں پیش کیں، آپ راشدمنہاس، سرفراز رفیقی اور ایم ایم عالم جیسے بنیں۔
آرمی چیف جنرل عاصم منیر نے مزید کہا کہ اسلحے کی دوڑ سے ہمارے خطے میں طاقت کا توازن بگڑنے کا امکان ہے، مضبوط فضائیہ کے بغیر ملک کسی بھی جارح کے رحم وکرم پر ہوتا ہے۔ پاک فضائیہ نے ہرطرح کی مشکلات میں فضائی حدود کی نگرانی کی، پاک فضائیہ ہمیشہ قوم کی توقعات پر پورا اتری ہے اور فروری2019ء میں فضائی نگرانی کی بڑی مثال سب کے سامنے ہے۔
جنرل عاصم منیر نے کہا کہ غزہ جنگ تازہ ترین مثال ہے کہ جنگیں کیا کیا مصائب لاسکتی ہیں، غزہ میں اندھا دھندقتل ثبوت ہے کہ دنیا میں تشدد بڑھ رہاہے۔ مقبوضہ کشمیر پر بھی بھارت نے اپنا ناجائز قبضہ کر رکھاہے، بھارتی جارحیت پردنیاکی خاموشی آزادی کی آواز کو دبا نہیں سکتی۔ کشمیری بھائیوں کی اخلاقی، سیاسی اور سفارتی حمایت جاری رکھیں گے۔
واضح رہے کہ پی اے ایف اصغر خان اکیڈمی رسالپور میں پاسنگ آؤٹ پریڈ میں آرمی چیف جنرل عاصم منیر تقریب کے مہمان خصوصی تھے۔ مارچ پاسٹ پر فوجی بینڈ نے دلوں کو گرما دینے والی دھنیں بکھیریں۔ آرمی چیف اور ائیر چیف نے پریڈ کا معائنہ کیا۔ چیمپئن اسکواڈرن کو قائد اعظم بینر عطا کیا گیا۔ کیڈٹس نے وطن عزیز سے وفاداری کا حلف اٹھایا۔ پاک فضائیہ طیاروں کی شاندار فلائی پاسٹ توجہ کا مرکز رہی۔
