لاہور کی انسداد دہشت گردی عدالت نے دھماکہ خیز مواد برآمد ہونے کے مقدمے میں کالعدم تنظیم کے رکن کو آٹھ سال قید بامشقت کی سزا سنادی ، عدالت نے ملزم حماس خان کی تمام جائیداد بحق سرکار ضبط کرنے کا حکم بھی دیدیا ۔
انسداد دہشت گردی عدالت کےجج شاہد سکندرنےکیس کا فیصلہ سنایا ، سی ٹی ڈی لاہور نے ملزم حماس خان کیخلاف شواہد عدالت میں پیش کیے ، پراسیکیوشن کے مطابق ملزم ڈیرہ اسماعیل خان کا رہائشی اور واپڈا کا ملازم ہے ، ملزم کے وکیل کے مطابق وہ واپڈا آفس سے سرکاری کرین کی کیبل لینے لاہور آیا تھا ۔ پراسیکیوشن نے بتایا کہ ملزم حماس خان کا کالعدم تنظیم سے تعلق ہے ، ملزم کو دھماکہ خیز مواد کی برآمدگی پر گرفتار کیا گیا ، عدالت نے جرم ثابت ہونے پر فیصلہ سنتے ہوئے ملزم حماس خان کو آٹھ سال قید کی سزا سنا دی اور عدالت نے تمام جائیداد بحق سرکار ضبط کرنے کا حکم بھی دیدیا ۔
