گھوٹکی کےعلاقے رونتی کچے میں جاری آپریشن مکمل کر لیاگیا، پولیس نے کچہ کا علاقہ سو فیصد کلئیر کروالیا ہے۔ ڈیڑہ ماہ تک جاری رہنےوالے آپریشن میں درجنوں مغوی بازیاب کروائے گے جبکہ 70سے زائد خطرناک ڈاکووں نے بھی خود کو پولیس کے حوالے کر دیا۔
کچے رونتی میں جاری نجات مہران آپریشن میں سیکیورٹی فورسز کو بڑی کامیابیاں حاصل ہوئی ہیں۔ ایس ایس پی گھوٹکی انور کھیتران کے مطابق پولیس اور رینجرز کے مشترکہ آپریشن کے دوران ستر سے زائد خطرناک ڈاکوؤں نے ہتھیار ڈال دیئے ہیں جبکہ ڈاکوؤں کے عقوبت خانوں سے درجنوں مغویوں کو بحفاظت بازیاب بھی کرایا گیا ہے۔ڈیڑھ ماہ سے جاری آپریشن کے نتیجے میں کچے کے علاقے کو سو فیصد کلیئر کرالیا گیا ہے۔ اب وہاں مکمل طور پر پولیس کا کنٹرول قائم ہو چکا ہے۔
ایس ایس پی کے مطابق پہلے اس علاقے میں آمد و رفت کی سہولت بھی موجود نہیں تھی تاہم اب بس سروس کا آغاز بھی کر دیا گیا ہے اور علاقے میں امن و امان کی صورتحال بحال ہو چکی ہے۔انہوں نے مزید کہا کہ سرنڈر کرنے والے ڈاکوؤں کو قانون کے مطابق عدالتوں میں پیش کیا جائے گا جبکہ علاقے میں پائیدار امن برقرار رکھنے کے لیے پولیس کی موجودگی بدستور برقرار رہے گی۔
