نکاراگوا کی شینس پلاسیئوس نے مس یونیورس 2023 کا ٹائٹل اپنے نام کر لیا ہے۔
رپورٹ کے مطابق مس یونیورس کے انتخاب کیلئے مقابلے کا انعقاد ہفتہ کو لاطینی امریکا کے ملک ایلسلواڈور میں ہوا، جس میں 84 ممالک کی حسیناؤں نے حصہ لیا۔
نکارا گووا کی 23 برس کی شینس پلاسیئوس 72ویں حسینہ عالم منتخب ہوگئیں، انہیں 2022ء کی مس یونیورس نے تاج پہنایا۔
رپورٹ کے مطابق فائنل راؤنڈ میں نکاراگوا، تھائی لینڈ اور آسٹریلیا کی حسنیاؤں کا مقابلہ تھا، جس میں شینس پلاسیئوس نے مس یونیورس 2023ء کا تاج اپنے سر پر سجالیا، وہ نکاراگوا کی پہلی خاتون ہیں جو مس یونیورس منتخب ہوئیں۔
جیوری سے سوال اور جواب کے وقت مس یونیورس نے جنسی امتیاز سے قطع نظر مساوی تنخواہ کی اہمیت پر زور دیتے ہوئے کہا کہ خواتین ہر شعبے میں کام کرسکیں گی۔
مس یونیورس 2023ء کا آخری سوال تھا کہ اگر آپ خود کو ایک اور عورت کے روپ میں دیکھیں تو آپ کس کو منتخب کریں گی اور کیوں؟۔ جس پر مس آسٹریلیا نے اپنی والدہ اور مس تھائی لینڈ نے نوبل انعام یافتہ ملالہ یوسفزئی کا نام لیا جبکہ مس نکاراگوا نے میری وال اسٹون کرافٹ کا نام لیا جو حقوق نسواں کی کارکن اور ’مدر آف فیمن ازم‘ کے طور پر جانی جاتی ہیں۔
مس یونیورس کے مقابلے میں شویتا شردھا نے انڈیا کی نمائندگی کی، وہ پہلے 20 حسیناؤں کی فہرست میں جگہ بناسکیں جبکہ پاکستانی نژاد امریکی خاتون نے بھی مس یونیورس 2023ء کے مقابلے میں حصہ لیا۔
