بونیر کی سرزمین ایک بار پھر قابلیت، محنت اور عزم کی نئی داستان رقم کرنے لگی۔ تحصیل تورورسک سے تعلق رکھنے والے محمد بلال نے سی ایس ایس 2025 کے مشکل ترین امتحان میں نمایاں کامیابی حاصل کرتے ہوئے خیبرپختونخوا میں ٹاپ پوزیشن اپنے نام کرلی، جبکہ ملک بھر میں 18ویں پوزیشن حاصل کرکے اپنی صلاحیتوں کا لوہا منوا دیا۔
محمد بلال کا کہنا ہے کہ یہ کامیابی مسلسل محنت، ثابت قدمی اور خوابوں پر یقین کا نتیجہ ہے۔ انہوں نے نوجوانوں کو پیغام دیتے ہوئے کہا کہ اگر انسان سچے دل سے محنت کرے تو کامیابی ضرور ملتی ہے۔
بونیر کے اس ہونہار سپوت کی کامیابی پر علاقے بھر میں خوشی کی لہر دوڑ گئی ہے۔ مقامی افراد کے مطابق محمد بلال نے نہ صرف اپنے خاندان بلکہ پورے خطے کا سر فخر سے بلند کردیا ہے۔
محمد بلال کے والد ڈپٹی کمشنر آفس بونیر میں بطور نائب قاصد فرائض انجام دے رہے ہیں۔ ان کی خواہش تھی کہ بیٹا ڈاکٹر بنے، تاہم محمد بلال نے اپنے شوق اور وژن کے مطابق ایڈمنسٹریٹو سروسز کا انتخاب کیا اور آج شاندار کامیابی حاصل کرکے اپنی منزل پا لی۔
واضح رہے کہ سی ایس ایس 2025 کا امتحان انتہائی مشکل ثابت ہوا، جہاں کامیابی کی شرح صرف 2.67 فیصد رہی۔ 12 ہزار 792 امیدواروں میں سے محض 335 امیدوار تحریری امتحان میں کامیاب قرار پائے، جس سے محمد بلال کی کامیابی کی اہمیت مزید بڑھ گئی۔
