پاکستان ٹیلی کمیونیکیشن اتھارٹی نے آزاد کشمیر اور گلگت بلتستان میں موبائل فون آپریٹرز کی کارکردگی کا جائزہ لینے کے لیے چوتھی سہ ماہی کا مشترکہ 'کیو او ایس' سروے مکمل کر لیا ۔ سروے کا مقصد دور افتادہ علاقوں میں وائس کالز، ایس ایم ایس اور موبائل انٹرنیٹ کی فراہمی کے معیار کو یقینی بنانا ہے تاکہ صارفین کو بہتر کنیکٹیویٹی میسر آ سکے۔
پی ٹی اے کی رپورٹ کے مطابق، آزاد کشمیر کے چار شہروں مظفرآباد، کوٹلی، راولاکوٹ اور پلندری میں جدید مانیٹرنگ ٹولز کے ذریعے ڈیٹا اکٹھا کیا گیا۔ گلگت بلتستان کے پانچ شہر استور، گلگت، غذر، ہنزہ اور شگر بھی سروے میں شامل تھے۔ نتائج کے مطابق زیادہ تر کمپنیوں نے فور جی اور ایل ٹی ای سگنل کے معیار کو برقرار رکھا ہے۔ کارکردگی کے لحاظ سے آزاد کشمیر میں ڈاؤن لوڈ اسپیڈ میں 'زونگ' نمایاں رہا، جبکہ گلگت بلتستان میں 'ایس سی او ایم' اور 'ٹیلی نار' نے بہتر نتائج دیئے۔ پی ٹی اے نے مجموعی طور پر آپریٹرز کی کارکردگی کو تسلی بخش قرار دیا ہے، تاہم بعض علاقوں میں سروس مزید بہتر بنانے کے لیے متعلقہ کمپنیوں کو ضروری ہدایات بھی جاری کر دی گئی ہیں۔
