ترجمان ایرانی وزارتِ خارجہ اسماعیل بقائی کا کہنا ہے کہ امریکی ناکہ بندی پاکستان کی ثالثی میں ہونیوالی جنگ بندی معاہدے کی خلاف ورزی ہے۔
سوشل میڈیا پر ایک بیان میں ایرانی وزارتِ خارجہ کے ترجمان اسماعیل بقائی نے کہا کہ امریکی ناکہ بندی کا اقدام غیر قانونی اور مجرمانہ ہے۔
ایرانی سپریم لیڈر کے مشیر علی اکبر ولایتی نے کہا کہ سمندر پار سے سکیورٹی مسلط کرنے کا دور ختم ہو چکا، آبنائے ہرمز، ملاکا اور باب المندب کی سکیورٹی ہمارے ہاتھ میں ہے، کسی بھی شرارت کا جواب سلسلہ وار ردِعمل کی صورت میں دیا جائے گا۔
علی اکبر ولایتی نے کہا کہ برطانیہ اور فرانس کو جہاز رانی کی سلامتی کا شوق ہے تو انگلش چینل اور جبرالٹر کا مسئلہ حل کریں، ہم اسپین کے خودمختار اور دانشمندانہ مؤقف کی قدر کرتے ہیں۔
قبل ازیں ایرانی آرمی چیف امیر حاتمی نے کہا کہ ایرانی فوج آخری سانس تک دشمن کا مقابلہ کرے گی، اپنی عسکری صلاحیتوں کو مزید بڑھانے کیلئے تیار ہیں، ایرانی افواج قربانی اور جہاد کے جذبے سے سرشار ہیں۔
