فیلڈ مارشل عاصم منیر کا کہنا ہے کہ افغان سرزمین پاکستان کیخلاف استعمال نہیں ہونی چاہیے۔ ملکی سلامتی کو نقصان پہنچانے نہیں دیں گے۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے کرم کا دورہ کیا جہاں انہوں نے عیدالفطر فوجی جوانوں اور افسران کے ساتھ منائی۔
فیلڈ مارشل عاصم منیر نے عید کی نماز ادا کی اور پاکستان کے استحکام اور خوشحالی کے لیے خصوصی دعائیں کیں۔ اس موقع پر انہوں نے جوانوں اور افسران سے ملاقات کے دوران انہیں عید کی مبارکباد دی اور ان کی پیشہ ورانہ مہارت، بلند حوصلے اور قومی سلامتی کے لیے غیر متزلزل عزم کو سراہا۔
آئی ایس پی آر کے مطابق چیف آف آرمی اسٹاف نے جوانوں کی پیشہ ورانہ مہارت اور بلند حوصلے کی تعریف کیں۔ آپریشن غضب للحق میں کامیابیوں پر فوجی جوانوں کی بہادری کو سراہا۔
فیلڈ مارشل نے کہا آپریشن کا مقصد دہشتگرد نیٹ ورک کا خاتمہ اور سرحدی علاقوں کا تحفظ یقینی بنانا تھا۔ دشمن عناصر کی جانب سے پاکستان کیخلاف افغان سرزمین استعمال نہیں ہونی چاہیے۔ ملکی سلامتی کو نقصان پہنچانے نہیں دیں گے۔ پاکستان علاقائی امن واستحکام کیلئے پرعزم ہے۔
فیلڈ مارشل نے فرض کے جذبے سے سرشار افسران اور جوانوں کے عزم کو خراج تحسین پیش کیا۔ فیلڈ مارشل نے فوجی جوانوں کی استقامت پر فخر کا اظہار کیا اور پاکستان کی خودمختاری اور علاقائی سالمیت کے دفاع کے لیے مسلح افواج کے غیر متزلزل عزم کا اعادہ کیا۔
