بھارتی کرکٹ ٹیم کے اسٹار بولر محمد شامی کی اہلیہ حسین جہاں نے اپنے شوہر کی ورلڈکپ 2023ء میں شاندار کارکردگی پر ردعمل کا اظہار کرتے ہوئے کہا کہ ’’کاش وہ اچھے کرکٹر کی طرح اچھے انسان، شوہر اور باپ بھی ہوتے‘‘۔
محمد شامی نے اب تک ون ڈے ورلڈ کپ میں 23 وکٹیں حاصل کر رکھیں ہیں وہ ایونٹ کے ٹاپ بولر ہیں، ان کی تباہ کن بولنگ نے اس ایونٹ میں ٹیم انڈیا کو کئی میچز جتوائے جبکہ نیوزی لینڈ کیخلاف سیمی فائنل میں بھی محمد شامی نے 57 رنز دیکر اپنے کیرئیر بیسٹ بولنگ کرتے ہوئے 7 کھلاڑیوں کو آؤٹ کیا تھا۔
بھارتی میڈیا کو دیئے گئے انٹرویو میں محمد شامی کی اہلیہ حسین جہاں نے کہا کہ خوشی تو ہورہی ہے کہ بھارت فائنل میں پہچا، اب امید اور اللہ سے دعا ہے کہ یہ ورلڈ کپ ہمارے ملک کے نام رہے۔
محمد شامی کی کارکردگی سے متعلق سوال پر حسین جہاں نے کہا کہ کبھ یکبھی دل میں یہ باتیں آتی ہیں کہ انہیں کرکٹر کی طرح اچھا انسان بھی ہونا چاہئے تھا، لوگوں کو ہماری پروفیشنل لائف اور ذاتی زندگی الگ رکھنی چاہئے۔
ان کا مزید کہنا تھا کہ کاش شامی جتنا اچھا کھلاڑی ہے اتنا ہی اچھا باپ، شوہر اور انسان بھی ہوتا، اگر ایسا ہوتا تو میں، شامی اور ہماری بیٹی بہت اچھی زندگی گزار رہے ہوتے۔
واضح رہے کہ محمد شامی پر ان کی اہلیہ نے تشدد کے الزامات لگائے تھے، جس پر مقدمہ درج کرکے بھارتی کرکٹر اور ان کے بھائی کو گرفتار بھی کیا گیا تھا۔
حسین جہاں نے یہ بھی کہا کہ شامی کی غلطیوں، لالچ اور گندے دماغ کی وجہ سے ہم تینوں کو یہ سب جھیلنا پڑ رہا ہے، شامی زیادہ پیسوں اور ان کی نمائش کرکے اپنی مشکلات چھپانے کی کوشش کررہا ہے لیکن میں کسی چیز کو چھپاتی نہیں ہوں۔
واضح رہے کہ 2014 میں محمد شامی نے ماڈل حسین جہاں سے شادی کی تھی تاہم اب شامی اور ان کی اہلیہ کے درمیان 2019ء سے کیس چل رہا ہے۔
