پنجاب نگران حکومت نے موٹرویز اور ہائی ویز پر فٹنس سرٹیفکیٹ اور روٹ پرمٹ کے بغیر گاڑیوں کے داخلے پر پابندی عائد کر دی ہے۔
رپورٹس کے مطابق حکومت نے نگران وزیر اعلیٰ پنجاب محسن نقوی کی موجودگی میں پابندی کے نفاذ کے لیے نیشنل ہائی ویز اینڈ موٹروے پولیس کے ساتھ ایک معاہدے پر دستخط کیے۔معاہدے کے تحت پنجاب ٹرانسپورٹ ڈیپارٹمنٹ اور موٹروے پولیس کے لیے گاڑیوں کی فٹنس اور روٹ پرمٹ کے بارے میں معلومات کا اشتراک کرنا لازمی قرار دیا گیا ہے۔
دونوں محکموں کے ذریعے معلومات کے تبادلے کی نگرانی اور قواعد کے نفاذ کو یقینی بنانے کے لیے فوکل پرسنز کا تقرر کیا جائے گا۔یہ معاہدہ پنجاب میں سموگ کو کم کرنے کے لیے صوبائی حکومت کی کوششوں کا حصہ ہے۔
تقریب سے خطاب کرتے ہوئے نگران وزیراعلیٰ محسن نقوی نے ماحول دوست اقدام کو سراہا۔غیر رجسٹرڈ چنگچی رکشوں کے لیے ایک بڑے اعلان میں انہوں نے کہا کہ ان کے پاس اپنی گاڑیوں کی مفت رجسٹریشن کے لیے ایک ماہ کا وقت ہے۔اس کے بعد غیر رجسٹرڈ رکشوں کو سڑکوں پر چلنے کی اجازت نہیں دی جائے گی۔
علاوہ ازیں نگراں وزیراعلیٰ نے نیشنل ہائی وے اتھارٹی کے تعاون سے لاہور اسلام آباد ایم 2 موٹروے پر ٹراما سینٹر کے قیام کا بھی اعلان کیا۔
