پاکستان کرکٹ بورڈ ( پی سی بی ) اور بھارتی کرکٹ بورڈ کے درمیان چیمپئنز ٹرافی 2025 کے حوالےسے تمام معاملات طے پاگئے۔
ذرائع کے مطابق چیمپیئنز ٹرافی کی راہ میں حائل ساری رکاوٹیں دور ہوگئیں اور روایتی حریف فیوژن فارمولے پر متفق ہوگئے ہیں جبکہ معاہدوں کی تشکیل آخری مرحلے میں داخل ہوچکی ہے اور اس حوالے سے انٹرنیشنل کرکٹ کونسل ( آئی سی سی ) آج یا کل حتمی اعلان کرے گی۔
لازمی پڑھیں۔ چیمپیئنز ٹرافی، پاکستان کا بھارت کے میچز کولمبو میں کرانے پرغور
ذرائع نے بتایا کہ آئی سی سی اور بھارتی بورڈ نے پاکستان کی تمام شرائط مان لی ہیں اور چیمپئنز ٹرافی کے معاملے پر اب کسی قسم کی کوئی پیچیدگی نہیں رہی۔
چیمپئنز ٹرافی ہائبرڈ ماڈل کے تحت ہوگی اور بھارتی ٹیم تمام میچز دبئی میں کھیلے گی جبکہ انڈین ٹیم اگر ناک آؤٹ مرحلے میں نہ پہنچی تو سیمی فائنل اور فائنل بھی پاکستان میں ہی کھیلا جائے گا۔
فیوژن فارمولے کی شرائط کے مطابق پاکستان بھی 2027 تک بھارت میں شیڈول ایونٹس نیوٹرل وینیو پر کھیلے گا۔
بھارت نے اگلے سال ایشیا کپ اور 2026 میں ٹی 20 ورلڈ کپ کی میزبانی کرنی ہے جس میں پاکستان اپنے میچز نیوٹرل وینیو پر کھیلے گا۔
ذرائع کا مزید کہنا تھا کہ آئی سی سی آج یا کل چیمپیئنز ٹرافی کے حوالے سے حتمی اعلان کرے گی۔
