پاکستان نے ون ڈے کرکٹ میں ایک ہزار میچز کا تاریخی سنگ میل عبور کر لیا۔
پاکستان کرکٹ ٹیم نےون ڈے انٹرنیشنل کرکٹ میں ایک اور اہم اعزاز اپنے نام کرتے ہوئے ایک ہزار میچز مکمل کر لیے ہیں،پاکستان آسٹریلیا اور بھارت کے بعد یہ سنگ میل عبور کرنے والی دنیا کی تیسری ٹیم بن گئی ہے۔
پاکستان نے اپنے ایک ہزار ون ڈے میچز میں 527 فتوحات حاصل کیں جبکہ 442 مقابلوں میں شکست کا سامنا کرنا پڑا،گرین شرٹس نے سب سے زیادہ 160 ون ڈے میچزسری لنکا کےخلاف کھیلے،جن میں 96 میں کامیابی اور 59 میں شکست ہوئی۔
ویسٹ انڈیز کے خلاف 141 میچز میں پاکستان نے 64 فتوحات حاصل کیں جبکہ 73 بار ناکامی کا سامنا کیا۔ روایتی حریف بھارت کے خلاف 136 ون ڈے مقابلوں میں پاکستان نے 73 میچ جیتے جبکہ 58 میں شکست ہوئی۔
ٹیم کا سب سےبڑا ون ڈے اسکور 399 رنز ہے جو 2018 میں زمبابوے کے خلاف بنایاگیا،جبکہ سب سے کم مجموعہ 43 رنز ہے جو 1993 میں ویسٹ انڈیز کے خلاف ریکارڈ ہوا،پاکستان کے خلاف کسی بھی ٹیم کا سب سے بڑا اسکور انگلینڈ کے 444 رنز ہیں، جبکہ افغانستان کے 59 رنز پاکستان کے خلاف کم ترین ٹیم اسکور ہیں۔
گرین شرٹس کی سب سے بڑی فتح آئرلینڈ کے خلاف 255 رنز سےرہی،جبکہ سب سے بڑی شکست سری لنکا کے ہاتھوں 234 رنز سے ہوئی۔
انفرادی کارکردگیوں میں انضمام الحق 11,739 رنز کےساتھ پاکستان کےکامیاب ترین ون ڈے بیٹرہیں، جبکہ محمد یوسف 9,720 رنز کےساتھ دوسرے نمبرپرموجود ہیں،بولنگ میں سابق کپتان وسیم اکرم 502 وکٹوں کے ساتھ سرفہرست ہیں جبکہ وقار یونس 416 وکٹوں کے ساتھ دوسرے نمبر پر ہیں۔
سنچریوں کےاعتبارسےسعید انور اوربابراعظم 20،20 سنچریاں بناکرمشترکہ طور پرپہلےنمبر پر ہیں فخر زمان کی زمبابوےکےخلاف 210 رنزکی ناقابلِ شکست اننگزپاکستان کی جانب سےسب سے بڑی انفرادی ون ڈےاننگزہے،جبکہ شاہدآفریدی کی ویسٹ انڈیز کےخلاف 12 رنزدےکر 7وکٹوں کی کارکردگی پاکستان کی بہترین ون ڈے بولنگ پرفارمنس شمار ہوتی ہے۔
