ڈیجیٹل میڈیا کے تیز رفتار دور میں جہاں نت نئے تنازعات جنم لیتے ہیں، وہیں کچھ نوجوان اسے مثبت انداز میں استعمال کرتے ہوئے کتاب دوستی کے فروغ کا ذریعہ بنا رہے ہیں۔ سوشل میڈیا پر کتابوں کی آن لائن خرید و فروخت نے نہ صرف قارئین کو سہولت فراہم کی ہے بلکہ نوجوانوں کو اس کاروبار کی جانب بھی راغب کیا ہے۔
عید کے موقع پر فیس بک پر ایک منفرد آن لائن کتاب میلے کا انعقاد کیا گیا، جہاں تین روز تک صارفین کتابوں کی خرید و فروخت میں مصروف رہے۔ اس میلے میں مختلف پبلشرز نے تقریباً پچاس فیصد رعایت کے ساتھ اپنے اسٹالز لگائے، اور بغیر کتب کو چھوئے ہزاروں کی تعداد میں کتابیں فروخت ہوئیں۔
یہ سرگرمی فیس بک کے "کتاب کہانی” نامی گروپ میں منعقد کی گئی، جس کا آغاز قطر میں مقیم ضلع خانیوال سے تعلق رکھنے والے علی رضا نے کیا۔ انہوں نے عید سے قبل ایک پوسٹ کے ذریعے آن لائن کتاب میلے کی تجویز دی، جسے صارفین اور پبلشرز کی جانب سے بھرپور پذیرائی ملی۔
علی رضا کے مطابق اس میلے میں تقریباً 13 پبلشرز نے حصہ لیا اور تین دنوں میں لگ بھگ پونے تین لاکھ روپے کی کتب فروخت ہوئیں، جنہیں عید کی تعطیلات کے بعد بذریعہ ڈاک صارفین تک پہنچایا گیا۔
خریداروں نے اس تجربے کو نہایت آسان اور مفید قرار دیا۔ ایک شہری محمد عمران کے مطابق انہوں نے گھر بیٹھے 13 کتابیں رعایتی قیمت پر حاصل کیں، جبکہ روایتی کتاب میلوں کے مقابلے میں یہ طریقہ زیادہ سہل محسوس ہوا۔
دوسری جانب پبلشرز کے لیے بھی یہ تجربہ فائدہ مند ثابت ہوا۔ شبد گھر پبلیکیشن سے تعلق رکھنے والے اقرار تبسم کا کہنا ہے کہ آن لائن کتاب میلے میں شرکت فزیکل بک فیئر کے مقابلے میں کہیں زیادہ آسان اور کم خرچ تھی، کیونکہ اس میں اسٹال، سفر اور دیگر اخراجات نہیں ہوتے۔
