رہائشی شعبے میں سرمایہ کاری کے فروغ کیلئے حکومتی اقدامات جاری ہے۔ وزیراعظم شہباز شریف کا کہنا ہے کہ اپنا گھر ہر شہری کا حق ہے۔ جبکہ آسان شرائط پر قرضوں کی فراہمی حکومت کی ترجیح ہے۔ کہا جامع حکمت عملی بناتے ہوئے صوبوں سمیت تمام اسٹیک ہولڈرز کو آن بورڈ لیا جائے۔
وزیراعظم کی زیرصدارت کم لاگت گھروں کی فراہمی اور روزگار میں اضافے پر جائزہ اجلاس ہوا۔ شہباز شریف نے کہا کہ رہائشی شعبے میں سرمایہ کاری کی وسیع استعداد موجود ہے۔ اس سے بھرپور استفادے کیلئے سرمایہ کاری کی راہ میں حائل رکاوٹیں دور کی جائیں گی۔
وزیراعظم نے بیرونی سرمایہ کاروں اور سمندر پار پاکستانیوں کی سرمایہ کاری کا تحفظ یقینی بنانے کی ہدایت بھی کی۔ کہا شعبہ تعمیرات میں سرمایہ کاری سے معیشت کا پہیہ چلے گا اور لاکھوں نوکریاں پیدا ہوں گی۔
وزیراعظم نے متعلقہ حکام کو قابل عمل حکمت عملی مرتب کرکے عملدرآمد یقینی بنانے کی ہدایت کی۔ اجلاس کو تعمیرات اور رہائشی شعبے پر ٹاسک فورس اور متعلقہ ورکنگ گروپس کی تجاویز پر بریفنگ دی گئی۔ بتایا گیا کہ ملک میں مارگیج فنانس کے پورے ایکو سسٹم کی تیاری پر کام تیزی سے جاری ہے۔۔ رہائشی تعمیرات کے شعبے کیلئے ڈویلپر لیڈ فنانسنگ کا جامع نظام بھی تشکیل دیا جارہا ہے۔
