افغانستان کے نیشنل ریزسٹنس فرنٹ کے رہنما احمد مسعود نے تقریب سے خطاب کرتے ہوئے افغان طالبان رجیم کو شدید تنقید کا نشانہ بنایا او رکہا کہ طالبان نے افغانستان کے عوام کو دہشت گرد گروہوں کی حمایت میں قربان کر دیا ہے۔
احمد مسعود نے الزام لگایا کہ طالبان نے القاعدہ، تحریک طالبان پاکستان (ٹی ٹی پی)، جیش العدل، انصار اللہ اور دیگر دہشت گرد تنظیموں کو محفوظ پناہ گاہیں فراہم کرکے افغانستان کو سیکیورٹی اور جیو پولیٹیکل کھیل کا میدان بنا دیا ہے۔ان کا کہنا تھا کہ پاکستانی فوج کی جانب سے افغان سرزمین پر حملے بھی طالبان کی لاپرواہی اور دہشت گرد تنظیموں کی حمایت کا نتیجہ ہیں۔ احمد مسعود نے زور دیا کہ آج کا بحران اور ماضی کے تمام بحرانوں کی جڑ طالبان ہیں، جنہوں نے برسوں سےٹی ٹی پی اور دیگر گروہوں کو شیلٹر، جیش العدل اور دیگر تنظیموں کو پناہ دے کر ، تاجکستان کی انصار اللہ اور دیگر گروہوں کو سپورٹ کر کے اور القاعدہ سمیت دیگر دہشت گردوں کو پناہ گاہیں دے کر افغانستان کو سیکیورٹی مسائل اور جیو پولیٹیکل کھیلوں میں گھسیٹا ہے۔
انہوں نے کہا کہ آج جو جنگ اور صورتحال پیدا ہوئی ہے، وہ طالبان کی غیر دانشمندانہ کارروائیوں کا براہ راست نتیجہ ہے۔
