پاکستان اور جرمنی کے ترقیاتی بینک کے درمیان 18 ملین یورو گرانٹ کا معاہدہ طے پا گیا ، شمالی علاقوں میں گرین انرجی منصوبوں کیلئے مالی معاونت فراہم کی جائے گی۔
پاکستان اور جرمنی کے سرکاری ترقیاتی بینک کے درمیان گرانٹ معاہدے پر دستخط کر دیئے گئے , جرمن ترقیاتی بینک کے ایف ڈبلیو پاکستان کو 18ملین یورو فراہم کرے گا۔ رقم شمالی علاقوں میں گرین انرجی اور قابل تجدید توانائی کے منصوبوں کے فروغ کیلئے استعمال کی جائے گی۔
معاہدے پر پاکستان کی جانب سے سیکرٹری اقتصادی امور محمد حمیر کریم جبکہ جرمن ترقیاتی بینک کی جانب سے کنٹری ڈائریکٹر سباسچیئن جیکوبی نے دستخط کیے۔ سیکرٹری اقتصادی امور نے جرمن حکومت کا شکریہ ادا کیا اور کہا یہ معاونت خطے کی بڑھتی ہوئی توانائی ضروریات کو پورا کرنے میں مددگار ثابت ہوگی۔
کنٹری ڈائریکٹر جرمن ترقیاتی بینک کا کہنا تھا کہ گرانٹ کے ذریعے شمالی علاقوں کے عوام کو پائیدار توانائی تک رسائی حاصل ہوگی۔ اس اقدام سے روزگار کے نئے مواقع پیدا ہوں گے اور سیاحت کو بھی فروغ ملے گا۔
