پاکستان نے مسجدالاقصیٰ میں اسرائیلی وزیروں کی اشتعال انگیزی کی مذمت کرتے ہوئے کہا ہے کہ غزہ میں اسرئیل کا غیرقانونی محاصرہ قبول نہیں۔
غزہ کی صورتحال پر اقوام متحدہ کی سلامتی کونسل کے اجلاس سے خطاب کرتے ہوئے پاکستانی مستقل مندوب عاصم افتخار کا کہنا تھا کہ غزہ میں اسرائیلی محاصرہ فوری طور پر ختم ہونا چاہیے۔
عاصم افتخار کا کہنا تھا کہ فلسطینیوں کی جبری بے دخلی کو مسترد کرتے ہیں، فلسطینیوں کو ان کا حق دیا جائے اور امداد کی فراہمی بحال کی جائے۔
پاکستانی مندوب کا کہنا تھا کہ مسجدالاقصیٰ میں اسرائیلی وزیروں کی اشتعال انگیزی کی مذمت کرتے ہیں۔
ان کا کہنا تھا کہ غزہ میں اسرائیل مظالم کو فوری طور پر بند کیا جائے، غزہ میں اسرئیل کا غیرقانونی محاصرہ قبول نہیں۔
انہوں نے کہا کہ اسرائیلی حملوں میں اب تک ہزاروں فلسطینی شہید ہوچکے ہیں جبکہ خواتین اور بچوں کی بھی بڑی تعداد شہید ہوئی، غزہ کے لوگ امداد سے محروم ہیں اور اسپتالوں میں صورتحال سنگین ہے۔
