چیئرمین پاکستان علماء کونسل علامہ طاہر اشرفی نے کہا ہے کہ کُرم کے مسئلے پر ہم اپنی پگڑیاں فریقین کے قدموں میں رکھنے کیلئے تیار ہیں۔
پیر کے روز پریس کانفرنس کرتے ہوئے چیئرمین علماء کونسل علامہ طاہر اشرفی کا کہنا تھا کہ مدارس رجسٹریشن آرڈیننس کے تحت وزارت تعلیم اور صنعت و تجارت دونوں میں سے کسی بھی وزارت میں مدارس کی رجسٹریشن کرائی جا سکتی ہے۔
چیئرمین علماء کونسل کا کہنا تھا کہ مدارس دینی تعلیم کے مرکز ہیں، ہم کل بھی مدارس کے چوکیدار تھے اور آج بھی ہیں جبکہ آئندہ بھی رہیں گے، آرڈیننس کے تحت ڈی جی آر ای کے نظام کو سب نے تسلیم کر لیا ہے۔
طاہر اشرفی کا کہنا تھا کہ کُرم اور پاراچنار کی صورتحال پر سب پریشان ہیں، مسائل کا حل طاقت سے نہیں بلکہ مذاکرات سے ہوتا ہے، زمین کے تنازعے کو بات چیت سے حل کیا جائے اور کے پی حکومت سے گزارش ہے سنجیدگی کا مظاہرہ کیا جائے۔
ان کا کہنا تھا کہ ادویات نہ ملنے سے اموات ہو رہی ہیں یا لوگ پریشان ہیں تو یہ ہم سب کیلئے لمحہ فکریہ ہونا چاہیے، تمام شیعہ سنی اقابرین سے کہتا ہوں تلخیوں کے بجائے صبر سے کام لیا جائے، ہم اپنی پگڑیاں فریقین کے قدموں میں رکھنے کیلئے تیار ہیں۔
انہوں نے کہا کہ کراچی سمیت جہاں راستے بند ہیں اور لوگوں کی مشکلات کا خیال کرنا چاہیے۔
ان کا مزید کہنا تھا کہ پاکستان کے لوگوں کیلئے کوشش کریں تاکہ اس صورتحال سے باہر نکلا جائے، ایک ہفتے کے دوران 3بار الاقصیٰ کی اسرائیلی وزیر کی طرف سے بے حرمتی کی گئی جس کی ہم مذمت کرتے ہیں۔
