مشیر اطلاعات خیبرپختونخوا بیرسٹر سیف نے کرم میں 100 بچوں کی اموات کی خبر کی تردید کردی۔
واضح رہے کہ خیبرپختونخوا کے ضلع کرم میں حالات خراب ہونے کے باعث وہاں ادویات کی قلت سے 100 بچوں کی اموات کی خبریں زیر گردش تھیں۔
تاہم، صوبائی مشیر اطلاعات بیرسٹر سیف نے کرم میں ادویات کی قلت سے 100 بچوں کی اموات کی خبر کی تردید کرتے ہوئے اسے بے بنیاد قرار دے دیا ہے۔
اپنے بیان میں بیرسٹر سیف کا کہنا تھا کہ تمام ضروری ادویات روزانہ کی بنیاد پر ضلع کرم پہنچائی جا رہی ہیں اور چند شرپسند عناصر عوام کو گمراہ کرنے کی ناکام کوشش کر رہے ہیں۔
بیرسٹر سیف کا کہنا تھا کہ خیبرپختونخوا حکومت عوام کے تحفظ اور دائمی امن کے قیام کو اولین ترجیح دیتی ہے۔
ان کا مزید کہنا تھا کہ کرم میں تمام بنیادی ضروریات کو ترجیحی بنیادوں پر پورا کیا جا رہا ہے۔
