قومی احتساب بیورو ( نیب ) نے عوام کو فراڈ اور جعلسازی سے بچنے کے لیے محتاط رہنے کا انتباہ جاری کر دیا۔
نیب نے عوام کو خبردار کیا ہے کہ غیر رجسٹرڈ ہاؤسنگ اسکیموں کی فائلوں کی خرید و فروخت سے اجتناب کریں اور اے ٹی ایم کارڈ بلاک ہونے کے جعلی پیغامات پر کسی قسم کی تفصیلات فراہم نہ کریں ۔
نیب نے کرپٹو کرنسی کی آن لائن ٹریڈنگ، غیر قانونی ڈپازٹس اور پرائیویٹ لون ایپس کے ذریعے ہونے والے فراڈز سے محتاط رہنے کا مشورہ دیا ہے۔
نیب کی جانب سے عوام کو زیادہ منافع یا غیر حقیقی انعامات کے وعدوں پر یقین نہ کرنے کی ہدایت، ملٹی لیول مارکیٹنگ، آن لائن لاٹری اور بے نظیر انکم سپورٹ پروگرام کے جعلی پیغامات سے بھی ہوشیار رہنے کی تاکید کی گئی ہے ۔
نیب نے کہا ہے کہ فارن کرنسی کی آن لائن ٹریڈنگ، جعلی آن لائن ملازمت اور ویزوں کی پیشکش نو سربازوں کے حربے ہیں، شہری اپنے ذاتی یا بینک اکاؤنٹ کی معلومات، پاس ورڈ یا پن کوڈ کسی کو فراہم نہ کریں۔
نیب کا کہنا ہے کہ زیادہ منافع کے لالچ میں آنے کے بجائے احتیاط برتیں کیونکہ احتیاط پچھتاوے سے بہتر ہے۔
